Association gu pabangcham
Inpui-Zeliangrong maidung Makuilongdi gasu pabam tam-tamjiu lung marah khailu bosai, pating thengjiu Ringbo Tingwang tu simakjiu bambo wanga Tingwang gu kawicham American Baptist Mission gasu 1894 kum Manipur ga wangbo Rev. William Pettigrew niu dinkhaijiu Dikhenang Inka nahpiu Namrijinang Inka (Maipak) Inpui maigu namkhat Bakuwa kubo, Haochong Sub-Division, Tamenglong District, Manipur gasu 1914 kum Khristen thiupad raithu bo-e. Namrijinang papou-peh ken lam ra Liangmai thiujiu pawan khat Aling nam ga lung khai ye.
Sibo sainiu aliu Liangmai ruang ga raithubo thiujiu Taningjam ganiu Hulungbou Newmai nahpiu ‘Maisiging Newmai’ hai N-gienhiu (September) jengtung 16, 1923 bonai Joute nam gasu Khristen thiupad de. Pasaibo kum Pariwangbou (Mateibou) Luangdi nam gasu paniabo thiujiu Karamhiu (May) jengtung 17, 1924 bonai Khristen thiupad lande.
Kuki khatdi Inpui-Zeliangrong Khristen thiupadmai keng khangjiu 1924-1947 katang Sempang Phumling ganiu Mission Centre thiukhai-e. Haibo aruang se Inpui-Zeliangrong nai Kukimai 1947 kum npek lubo sainiu Khongjaron (Chiuluan) ga Namditiang Gangmei niu charam pabam paji wibo pikhai jiu 1949 kum suniu Inpui-Zeliangrong gu mission centre kam sude. Aliu Liangmai gu Association palang thiujiu kampad makkhaga, aliudi tam-tambo phom; Zeliangrong Christian Association (ZCA), North West Baptist Association (NWBA), Manipur Baptist Association No. 4 khatdi North West Area Baptist Association (NWABA) ga joujiu Tingwang gu lujam ga changam kammuijiu kam khang-e. 1969 kum niu Zeliangrong Baptist Association (ZBA) chiujiu pazan leng mathak khai lande.
ZBA niu changam kamwi raleng chakhon (Dialect) tam-tambo kumjiu palang madai leng kamkhaijiu Liangmai tu North Circle ga joukhai de. Sibo sainiu 1972 kum North Circle tu Liangmai Churches Fellowship chiujiu mathak khaijiu Ritiang (Chiang) ga Mission Centre kam sude. 1974 kum niu pajan leng Hamai North Baptist Association chiujiu kukhai lan lujiu Liangchi Phumling ganiu Kanahiu (March), jengtung 14, 1974 bonai Rev. MP. Namthiurei Field Secretary, ZBA niu Tingwang khuga kat ngut khaide.
Sichiu lubo sai Ritiang @ Chiang (Langmei) nam niu charam pabam-paji kawibo Mission Compound leng pikhaijiu tuhoi bambo Centre ga changam kamsu ra Karamhiu (May) jengtung 17, 1974 bonai H. Newmai, Executive Secretary niu Tingwang khuga kakheng thiu khaide. Karehiu (February) jengtung 2, 1984 bonai Liangmai Naga Baptist Association chiujiu Tamah (Piulekluang @ Malek) gasu din madukhaijiu MBC niudi haibojan lukhaijiu Kanahiu (March) 12, 1987 bonai Zinkiukamang Pamai, Church elder, Luangdi Phumling maipiu niu Tingwang khuga kat ngut khaide. Tuhoi katang aliu gu Association hai CBCNEI, MBC, CNBC khatdi ZBCCNEI ga aruang lujiu changam kam bamme. LNBA (M) masuang ga changam kambam mainiu chalung ngut jiu tien khaibo duan niu tuhoi Association hai mui khang bam me. Masuang changam kam khai jiu mathak mimai mathiuna tu thuon kiu ye.
